അറിയില്ലെനിക്കെന്‍റെ കൂട്ടുകാരാ.....

 

  
 

ചില സൌഹൃദങ്ങള്‍ നമ്മുക്ക് നിനക്കാതെ കിട്ടുന്നതാണ്... പരിചയപ്പെട്ടു കഴിയുമ്പോളായിരിക്കും ഒരിക്കല്‍ പോലും കാണാതെ എത്രമാത്രം  പരസ്പരം അറിയുന്നു എന്ന് മനസ്സിലാകുന്നത്‌.  അങ്ങനെ ഓര്‍കുട്ടിലൂടെ എനിക്ക് കിട്ടിയ ഒരു വിലപ്പെട്ട കൂട്ടുകാരന് വേണ്ടി ഞാന്‍ ഈ കവിത സമര്‍പ്പിക്കുന്നു.......!!

ജന്മാന്തരങ്ങളിലെന്നോ നാം 

കണ്ടുമറന്നവരായിരുന്നോ? 

അല്ലെങ്കിലെന്തേ നിന്‍ മനം കരയുമ്പോള്‍- 

എന്‍ കണ്ണില്‍ അശ്രുക്കള്‍ ചാലിടുന്നു?

ആരായിരുന്നു നീ അന്നെനിക്കെന്നു ഞാന്‍-

എന്നോട് പലവട്ടം ചോദിക്കുന്നു...

ഉത്തരം കിട്ടാത്ത ചോദ്യങ്ങളുമായി-

ന്നര്‍ഥങ്ങള്‍ തേടി അലഞ്ഞിടുന്നു. 

അന്ന് നീയെന്‍റെ കളിക്കൂട്ടുകാരനോ,

സോദരനോ അതോ എന്‍ പുത്രനോ? 

പിന്നെയും ശംങ്കിച്ചു നില്‍ക്കുന്നിതെന്‍ മനം-

ചോദിപ്പൂ നീയെന്‍റെ കാമുകനോ?

എന്‍റെ കളിക്കൂട്ടായിരുന്നെങ്കിലോ-

ഇടവത്തില്‍ പെയ്യുന്ന പെരുമഴയത്ത് നാം

ചെമ്പില ചൂടി നടന്നിരിക്കാം.

ഒരുമിച്ചു കൈകോര്‍ത്ത് ചേര്‍ന്ന്  നടന്നു നാം-

പള്ളിക്കൂടത്തില്‍ പോയിരിക്കാം ..

പോന്നോണത്തിനു പൂക്കളമിട്ടിടാന്‍-

തുമ്പപ്പൂ തേടി അലഞ്ഞിരിക്കാം.

നീ തന്ന സൌഹൃദ പീലിയെ അന്നെന്റെ-

പുസ്തക താളില്‍ ഒളിച്ചിരിക്കാം.

അറിയില്ലെനിക്കെന്‍റെ കൂട്ടുകാരാ-

നീയെന്‍ അരുമയാം ചങ്ങാതിയായിരുന്നോ?

നീയെന്‍റെ സോദരനായിരുന്നെങ്കിലോ,

അമ്മതന്‍ താരാട്ട് കേട്ടന്നോരുമിച്ചു-

 അച്ഛന്‍റെ മടിയില്‍ ഉറങ്ങിയിട്ടുണ്ടാവാം.

അന്നത്തെ ഉത്സവ ചന്തയില്‍ നിന്നെനി-

ക്കെന്തോക്കെ നീ വാങ്ങി തന്നിരിക്കാം?

കുപ്പിവളകളും, കണ്മഷി, ചാന്തും പിന്നു-

തസവ ചന്ത തന്‍ പലഹാരങ്ങളും.

അറിയില്ലെനിക്കെന്‍റെ  സോദരാ നാമന്നു-

ഒരു ഗര്‍ഭപാത്രത്തിലുത്ഭാവിച്ചോ?

നീയെന്‍റെ ഓമന കുഞ്ഞായിരുന്നെങ്കിലോ,

നിന്‍ പിഞ്ചു പാദങ്ങള്‍ പിച്ച വെക്കുന്നത്-
നിര്‍വൃതിയോടമ്മ കണ്ടിരിക്കാം.
കാക്കയെ കാണിച്ചു കൊണ്ട് നടന്നമ്മ-
പോന്നുണ്ണിയെ  അന്ന് ഊട്ടിയിട്ടുണ്ടാവാം.
അറിയില്ലെനിക്കെന്‍റെ  പുത്രാ എന്‍ മനമതില്‍-
അത്രമേല്‍ വാത്സല്യമുണ്ടിന്നും നിന്നോട്.

അന്ന് നീയെന്‍റെ പ്രിയനായിരുന്നെങ്കിലോ,
പ്രണയത്തിന്‍ തളിര്‍മര ചോട്ടിലിരുന്നെത്ര-
ഹൃദയ രഹസ്യങ്ങള്‍ പങ്കിട്ടിട്ടുണ്ടാവാം.
ഒരു മനവും ഒരു തനുവുമായന്നു നാം-
പ്രണയത്തിന്‍ മറുകര തെടിയിട്ടുണ്ടാവാം.
അറിയില്ലെനിക്കെന്‍റെ പ്രിയനേ നീയീ-
രാധതന്‍ കാര്‍വര്‍ണ്ണനായിരുന്നോ?


ഒന്നുമാത്രം പറഞ്ഞീടുന്നു ഇന്നും ഞാന്‍-
പൊയ്പ്പോയ ജന്മത്തില്‍ നീയെനിക്കാരോ ആയിരുന്നു.
അല്ലെങ്കില്‍ എന്തേ ഒരുമാത്ര പോലും കാണാതെ നാം തമ്മില്‍-
ഇത്രമേല്‍ അറിയാതറിഞ്ഞിടുന്നു...  !!